Eukuan minuat tshe tshitapatamak^u eshpanit tshitaimunnan. Tshika shaputuepannan e tshitapatamak^u eshi-pimipaniti aituna (verbes).

Neni aituna tshika tshitapatenan II : (Inanimé intransitif). Aitun eka ka inniuimakak an kie neni ishinikatamuna ashit eka ka inniuimakaki iapit tshika takuana. Apu takuannit mishkut tshekuannu tshipa katshitaim^u nete ushte, apu shaputuepanit ne tipatshimun nete mashten. Tshitapatamutau ne tipatshimuniss ka takuanua.

Mate : Nitakup mishau. Apu tshi anu ashushtain tshekuan, shash tshishtapanu tipatshimuniss. Eku ne kutak tipatshimuniss. Shash minuat tshimuan! Apu tshi uitakanit tshekuan an tshipa tshimuan kie ma auen tshipa tshimuan.

Nishtuait anite tatipanikanua neni aituna, tan tshe ishi-pimipaniti. Neni eshinakuaki aituna II, apu takuak ne mashten ka ishinikateua : ordre impératif mak ashit, apu kie mitsheki neni eshinikateti «personne grammaticale», eukuani neni muk^u tshiam tekuaki : 3S, 3P, 4S mak 4P.

Eukuani neni muk^u tshiam tshe tshitapatamak^u.

• Ushkat ishinikateu : ordre indépendantnete tipatshimunissit. Uitakanu tshekuan e aishpanit, tanite apu inniuimakak ne aitun.
  1. Kau nika tshikamutan nitakup, shash pashteu.
  2. « Apu ueueshiuian iu, Shutit, usham pikupanu nitakup ».
• Kutak ishinikateu : ordre conjonctif nete tipatshimunissit apashtakanu eka tiapuetatishunanuti, eka aitinanuti ne tshekuan, miam mate : apu mikuat, apu uapat, apu pimiut…
  1. Eshk^u apu (4s) pashtenit umassin nitanish, ui tshituteu.
  2. Eka apishashit mak eka pikupanit nitakup, nipa natshi-metuen unuitimit.

Ordre indépendant, mode indicatif, temps présent : II

	pashteu	apishashu	pikupanu
3S	pashteu	apishashu	pikupanu
3P	pashteua	apishashua	pikupanua
4S	pashtenu	apishashinu	pikupannu
4P	pashtenua	apishashinua	pikupannua

Ordre conjonctif, mode indicatif, temps présent : II

	pashteu	apishashu	pikupanu
3S	pashtet	apishashit	pikupanit
3P	pashteti	apishashiti	pikupaniti
4S	pashtenit	apishashinit	pikupannit
4P	pashteniti	apishashiniti	pikupanniti

Eukuani umeni passe aituna ka ishi-tatipanashtakaniti II

Eshinikatet	Passe aituna e tatipanashtakaniti
II : Inanimé intransitif	nutin, pipun, takuan, patshitin, minuashu, apishashu, mishau, tshimuan…

Kutshipanitak^u tshetshi tutamek^u neni aituna apashtak^u. Anite mashinaikanit utshipanua neni aituna : Guide de conjugaisons en langue innue, ka tutak ne Anne-Marie Baraby kie ma shatshuapatamuk^u anite Guide de conjugaisons.