Eukuan minuat tshe tshitapatamak^u eshi-pimipanit tshitaimunnan. Neni tshika uauitenan, aimuna ka atshitakaniti tshekuana (quantificateur eshinikateti meshtikushiu-aiminanut).

Mate : peik^u, patetat, nishunnu, peikuapiss, nishupishimua, patetat-tatutipapekaikan.

Apu muk^u tshiam peikushteti neni aimuna, tshipa tshi mitshena.

Mate ne tipatshimuniss: Ninipim, peikuapiss mak pushk^u nitshishikashuti.

Kie ma ne kutak: Nishunnu ashu kutuasht itatina kapapeikushteshiti meshtikushiu-mashinaitshenanut.

Ashit passe aimuna anishkushteua miam mate :

Shash kutuasht-tatutshishikua eshpish akushian nishkat.

Nanikutini uitakanu tshekuan etatik, muk^u apu uitakanit atshitashun.

Mate anema, kassinu, mitshet, nutim, passe.

Neni eshinakuaki aimuna, nanitam peikutau itashteua, apu mishkutshipaniti (invariable issishuenanu meshtikushiu-aiminanuti).

Mate, tshitapata ne tipatshimun, pimashinataikannua aimuna ka atshitakanit tshekuan.

Nika itutenan atauitshuapit utakussiti. Kutunnuetipapekaikan pimi nika aian, tanite nui tepatetshen. Peikuatakan nushkuauat iapit nika ui utinauat. Patetat-tatuapiss ishpitenitakuanitshe peikussimuteush napatata. Mitshet tshekuan nika ui natuapaten kie nutim nika ui mishken ka ishi-mashinataiman nimashinaikanit. Mishta-anema nika minu-mitshishun.