Eukuan minuat tshe tshitapatamak^u eshpanit tshitaimunnan. Tshika tshitapatenan minuat eshi-pimipaniti aituna (verbes).

Nishtuait anite tatipanikanua neni aituna, tan tshe ishi-pimipaniti.

• Ushkat ishinikateu : ordre indépendant nete tipatshimunissit takuana, nuiten tshekuan aitian mate… nitaiamian, nimitshishun, nitshiuepatan… Kutak kie auen tshika tshi aitu nenu.
  1. Nimushum iteu natukunisha : Nanitam nitaiamian tshetshishepaushuti mak niminu-mitshishun, eukuan uet minuinniuian.
  2. Tshitshiuepatan a tshin? Shash ninan nitshiuepatanan.
• Kutak ishinikateu : ordre conjonctif nete tipatshimunissit apashtakanua eka tiapuetatishunanuti, eka aitinanuti ne tshekuan, miam mate : apu aiamiaian, apu mitshishuian, apu tshiuepataian…
  1. Usham matshishikau apu pitama tshiuepataian anutshish.
  2. Passe auassat nasht apu ui aiamiaht, apu ishpitenitahk tshekuannu.
• Mashten ishinikateu : ordre impératif nete tipatshimunissit apatana neni aituna, auen ua shitshimakanit, ua tutuakaniti tshetshi tutak uemut tshekuannu, miam mate : aiamia, mitshishu, tshiuepata…
  1. Utauassima iteu : Ashuapata mak aiamia… eukuan muk^u tshiam tshe ui tutamin.
  2. Ashtam! Tshiuepatatau!

Neni e tatipanakaniti aituna : AI mak TI tshika uapatenan eshi-pimipaniti, muk^u tshiam ne ushkat ka uetak aitun, tshekuan ka ishinakuak (mode indicatif) mak anutshish ka ishpanit (temps présent).

Ordre indépendant, mode indicatif, temps présent : AI mak TI

	atusseu (AI)			uapatamu (TI)
1S	nitatussen		1S	nuapaten
2S	tshitatussen		2S	tshuapaten
3S	atusseu		3S	uapatamu
4	atussenua		4	uapataminua
1Pe	nitatussenan		1Pe	nuapatenan
1Pi	tshitatussenan		1Pi	tshuapatenan
2P	tshitatussenau		2P	tshuapatenau
3P	atusseuat		3P	uapatamuat

Ordre conjonctif, mode indicatif, temps présent : AI mak TI

	atusseu (AI)			uapatamu (TI)
1S	atusseian		1S	uapataman
2S	atussein		2S	uapatamin
3S	atusset		3S	uapatak
4	atusseniti		4	uapataminiti
1Pe	atusseiat		1Pe	uapatamat
1Pi	atusseiaku		1Pi	uapatamaku
2P	atuseieku		2P	uapatameku
3P	atusseht		3P	uapatahk

Ordre impératif, mode indicatif, temps présent : AI mak TI

	atusseu (AI)			uapatamu (TI)
2S	atusse		2S	uapata
1Pi	atussetau		1Pi	uapatamutau
2P	atusseku		2P	uapatamuku

Eukuani umeni passe aituna ka ishi-tatipanashtakaniti AI mak TI

Eshinikatet	Passe aituna e tatipanashtakaniti
AI : Animé intransitif	pimuteu, ituteu, mishishtu, akushu, animishu, atusseu, papatau, nipau, tshitimu, shikatshu…
TI : Transitif inanimé (tshekuan)	kushtamu, natamu, matshi-tutamu, matenitamu, minuenitamu, uapatamu, tutamu, petamu, sheimu…

Kutshipanitak^u tshetshi tutamek^u, neni aituna apashtak^u. Anite mashinaikanit utshipanua neni aituna : Guide de conjugaisons en langue innue, ka tutak ne Anne-Marie Baraby kie ma shatshuapatamuk^u anite Guide de conjugaisons.